荦荦妈妈 2012-1-18 13:19
豁“彩色翎子”搭仔发“外国嗲”
上个礼拜天，囡儿一家去昆山白相，带仔交关大闸蟹回老屋里孝敬爷娘。我搭仔老太婆开心得来眯花眼笑。还是小外孙老茄兮兮【逞能】关照外婆：“阿拉三家头中浪向吃过了，撑得腰细【要死】，所以夜里向只吃一只，陪陪外公外婆，两家头每人两只，一雌一雄，扎劲 ？”
我迭个人一向胃口勿大，一只四两半横里【左右】、老多蟹膏个雄蟹夯【吃】下去，有点上勿上【不行】了，加上晓得老太婆顶欢喜吃雌蟹个蟹黄，就豁只“彩色翎子”拨伊，假佯头讲“我吃勿落了，还有只雌蟹外婆帮忙消灭脱！”啥人晓得伊勿接翎子，反而怪我瞎客气，直别别来一句：“吃末吃来，发啥个外国嗲啦！”弄得我老呒没落场势个，眼睛拨瞪拨瞪，朝伊看仔半半六十日【很长时间】。囡儿女婿侪笑了，帮我解释：“迭个是老爸待侬好，侬还拎勿清！”老太婆也笑了：“我晓得伊想省拨我吃，不过叫我一记头吃三只大闸蟹，勿是开国际玩笑啦？”搿辰光小外孙开腔了，伊讲：“上趟班级里英语课代表测验勿及格，老师发吼【很生气】了，当场宣布撤伊个职，让我来做。我讲我勿来三个。老师叫我下了课到伊办公室去。我走到办公室窗外头，就听到老师垃拉帮班主任议论我勿肯做课代表个事体，讲我发外国嗲！啥意思啊？”我讲，上海闲话里个“发嗲”，除了“撒娇、做作”迭层意思外，还有“过分低调、保守”个延伸义，而“发外国嗲”则更加重了语气，表示叫人看勿懂啦！“喔，晓得了。葛末豁彩色翎子啥个意思啊？”外孙又问。我讲，豁翎子是“提醒、暗示”个意思，而“彩色翎子”则带有“是好事体，让对方得益”个含义。外孙一边点头一边讲：“今朝迭顿夜饭吃得老开心个，勿光是大闸蟹吃得开心，更加开心个是学会了两句老老挺括个上海闲话！”
囡儿收作【收拾】吃饭台子个辰光，问多下来迭只雌蟹吃勿脱哪能办啊？伊拉娘笃姗姗回答：“明朝我来拆蟹粉，烧只蟹粉豆腐拨 爷【你爸】吃……”。.
哇萨咪 2012-1-18 14:33
蛮有意思额。
现在我了qq上跟朋友吹牛皮，欢喜用上海闲话，有晨光跟老公发短信还用上海闲话，阿拉老公打出来额上海闲话，真叫要读出声音才令得清意思，要伐是啊，一片白字，啊哟，闷了海看啊，真额是吃力色。.
福宝大道 2012-2-5 22:21
哈哈，上海闲话就是有意思！八古快要绝种了，老可惜额！是政府额责任！.
burninglife 2012-2-6 16:41
回复 1楼荦荦妈妈 的帖子
听起来亲切，读起来有点7力。.